Крај на серијата неуспеси

Вардар „се истури“ за низата порази и го прегази Ловќен со 18 разлика

По киксовите со Нексе и со Војводина Вардар го совлада Ловќен со 41-23 во 16. коло од СЕХА-лигата и се врати на третото место на табелата

објавено: 6 март 2014 - 18:52

Гостувањето во Цетиње ја приведе до крај најлошата серија на РК Вардар оваа сезона. Македонскиот првак го декласираше Ловќен со 41-23, како одмазда за двата непланирани пораза претходно, од Нексе и од Војводина.

Јасни беа односите на теренот уште по воведните минути, затоа што Вардар отвори со серија од 6:0. Домаќинот чекаше на првиот гол дури до 11. минута, а веќе по 20 губеше двоцифрено, со 14:4. На полувреме важеше 23:8 за „црвено-црните“, а конечниот резултат, всушност, ја изрази и највисоката предност на мечот.

Крилата уште еднаш го водеа Вардар до победа, но овој пат резервните. Лука Раковиќ беше најефикасен со 11 гола, а Добривоје Марковиќ се надоврза со 9. Надпросечен беше и Петар Ангелов со 10 интервенции.

Со оваа победа Вардар собра 31 бод и се врати на третата позиција со само еден бод повеќе од Мешков Брест. Во следното, претпоследно коло му гостува на Борац и со победа и математички ќе го загарантира пласманот во фајнлфор.

ТАБЕЛА:

1.         Загреб             16        12        1          3          503 : 434         37
2.         Татран             15        12        0          3          517 : 418         36
3.         Вардар            16        10        1          5          470 : 415         31
4.         Мешков            15        10        0          5          408 : 379         30
5.         Металург         16        8          4          4          417 : 388         28
6.         Војводина        16        7          0          9          409 : 431         21
7.         Нексе               15        5          2          8          420 : 428         17
8.         Борац              15        4          0          11        355 : 451         12
9.         Ловќен             17        3          2          12        436 : 520         11
10.       Партизан         15        2          0          13        356 : 427         6

Најново во Ракомет