| контакт | маркетинг

08.07.2017

Играчите ќе избираат: клуб или репрезентација?

Светската кошаркарска асоцијација, ФИБА, изрази разочарување од новиот календар што го објави Евролигата, во кој нема предвидено пауза во термините кога ќе се играат репрезентативните натпреварувања.

Ова ќе значи дека кошаркарите што настапуваат во евролигашки екипи, нема да може да бидат со своите репрезентации во квалификациите за Светското првенство, во термините ноември годинава и во февруари 2018 година. 
Ваквиот потег на Евролигата оштетува голем број  европски селекции, особено оние најквалитетните. Од друга страна, им се дава шанса на помалите да приредат изненадување против некој фаворит, кој би играл драстично ослабен и некомплетен. Од македонските интернационалци и потенцијални репрезентативци, во Евролигата ќе настапуваат најмногу двајца, Перо Антиќ и Џордан Теодор.
ФИБА ја потсети Евролигата на писмото од 10 ноември 2016, во кое се тврдеше дека нема да ги попречува своите играчи за настапите за репрезентациите. Вака излегува дека играчите се ставени во многу непријатна позиција, сами ќе треба да одлучат дали да играат за клубот или за својата репрезентација, а со тоа и самите да ја сносат одговорноста и да ги трпат евентуалните последици. Постои опасност од конфликти помеѓу клубовите, играчите и националните федерации.
Во ФИБА сметаат оти проблемот ќе се избегнел ако Евролигата почнела една недела порано во октомври и со вметнување едно дополнително коло во вторник. Идејата за воведување „прозорци“ среде клупска сезона и ваков систем е со цел публиката во помалите земји да гледа квалитетни гостински селекции.
Поделеност има и во самите земји. Претседателот на италијанската Федерација, Џани Петручи, и селекторот Еторе Месина немаат исто гледиште на работите.
Петручи не размислува за суспензии, бидејќи не верува оти Армани, кој е единствениот италијански тим во Евролигата, ќе им забрани на своите репрезентативци да ја претставуваат татковината. Според Месина, проблемот го направила ФИБА, бидејќи не може да воведува систем како во фудбалот. За некои земји, репрезентацијата е побитна од клупските мечеви и оти не е фер што не ѝ се лутат на НБА туку само на Евролигата.
„Меси нема проблем да влезе во авион и да го прелета Атлантикот и да игра за Аргентина. Зошто само НБА ја има привилегијата да не ги пушта своите играчи да настапат за репрезентацијата?“, прашува Месина, а и генералниот менаџер на Фенербахче, Маурицио Герардини, се изјасни против квалификациите среде сезона, кои се против клупските интереси.



Датум: 08.07.2017, 17:34
Статијата е прочитана 2688 пати.

НАЈНОВИ ВЕСТИ
24.07.2017
24.07.2017
24.07.2017
24.07.2017
24.07.2017
МИКС
повеќе >
SPORT.COM.MK 2014. сите права задржани
DEVELOPED BY Nextsense